آزادی ڈیسک
رواں سال آزادجموں و کشمیر میں منعقد ہونے والے کشمیر پریمیر لیگ کا آفیشل ترانہ”کھیلوآزادی سے“ کے عنوان سے جاری کر دیا گیا ۔
ترانہ آزادی عالمی شہرت یافتہ گلوکار راحت فتح علی خان نے گایا جبکہ اسے وادی کشمیر کے حسین و دلفریب نظاروں کے پس منظر میں پاکستانی شوبز کے معروف چہروں پر فلمایا گیا ہے
https://youtu.be/t1V3gvt0Nrc
اس ترانے کی ہدایات پاکستان کے نامور اداکار اور کشمیر پریمیئر لیگ کے شوبز ایمبیسڈر شان شاہد نے دی ہیں۔

ترانے کا آغاز آزاد کشمیر کے برف پوش پہاڑوں سے ہوتا ہے جس میں مظفرآباد کرکٹ گراؤنڈ بھی دکھایا گیا ہے جہاں کے پی ایل کے میچز کھیلے جائیں گے۔
کشمیر پریمیئر لیگ کے ترانے میں ملک بھر سے تعلق رکھنے والی نامور شوبز شخصیات شان شاہد، راحت فتح علی خان ندیم بیگ، مہوش حیات، ایمان علی، فضا علی، جگن کاظم، عائشہ، صاحباں، جان ریمبو، گل پرنا اور نیلم منیر شامل ہیں۔

‘آزادی’ ترانے کی ویڈیو میں کرکٹر شاہد آفریدی، سوئنگ کے سلطان وسیم اکرم، عمران نذیر بھی موجود ہیں۔
واضح رہے کہ کے پی ایل، آزاد کشمیر میں قومی اور بین الاقوامی سطح پر ہونے والا پہلا میگا کرکٹ ایونٹ ہے۔

علاوہ ازیں اسکواش کے سابق ورلڈ چیمپئن جہانگیر خان، اسپورٹس اینکر مرزا اقبال بیگ، ریسلرز انعام بٹ اور شفیق چشتی، ہاکی کے کھلاڑی سمیع اللہ اور باکسر محمد وسیم بھی اس ترانے کا حصہ ہیں۔ کشمیر پریمیئر لیگ کی ٹی شرٹس پر پاکستان اور آزاد کشمیر دونوں کا جھنڈا بھی موجود ہے۔

کشمیر پریمیئر لیگ کا سلوگن ‘کشمیر پریمئیر لیگ۔۔۔ کھیلو آزادی سے’ سے ہے اور قومی کرکٹ ٹیم کے سابق کپتان اور مایہ ناز آل راؤنڈر شاہد خان آفریدی اس کے برانڈ ایمبیسیڈر جبکہ اداکار شان شاہد کشمیر پریمیئر لیگ کے شوبز ایمبسیڈر ہیں، راحت فتح علی خان لیگ کے آفیشل گلوکار ہیں۔
کشمیرپریمیئر لیگ 16 سے27 مئی تک آزاد کشمیر کے دارالحکومت مظفرآباد میں کھیلی جائے گی۔
کے پی ایل 6 ٹیموں پر مشتمل ہوگی جن میں راولا ہاکس، کوٹلی پینتھرز، میرپور رائلز، مظفرآباد ٹائیگرز، اوورسیز واریئرز اور باغ اسٹالینز شامل ہیں۔کشمیر پریمیئر لیگ کے میچز راولپنڈی کرکٹ گراؤنڈ، مظفرآباد کرکٹ گراؤنڈ اور میرپور کرکٹ گراؤنڈ میں کھیلے جائیں گے۔

Leave a Reply

Your email address will not be published.

Translate »