Spread the love

راحت ملک


افغان طالبان نے ایک طویل مسلح جدوجہد کے بعد بلآخر پر کابل پر تسلط جما لیا ہے تا حال یہ کہنا قبل ازوقت ہے کہ وہ ماضی کی طرح کابل پر اپنی واحد حاکمیت بحال کر پائیں گے یا اس بار انہیں افغانستان کے دیگر نسلی،لسانی قومیتی مذہبی گروہوں کی نمائندہ جماعتوں کو بھی شریک اقتدار واختیار کرنا پڑے گا ؟

صورتحال جیسی بھی ہوئی افغان طالبان کابل حکومت میں سب سے نمایاں طور پر اقتدار واختیار کے مالک ہونگے، افغانستان میں رونما ہونے والے اس واقعہ پر طالبان سمیت دنیا بھر میں حیرانی کا اظہار کیا جارہا ہے طالبان نے اقرار کیا ہے کہ اس قدر جلد اور سہل انداز میں انہیں کابل پر دسترس مل جائے گی اس کی توقع نہیں تھی۔

گویا کہ وہ کابل میں داخل ہوتے ہوئے ایک سخت مزاحمت کے خطرے یا امکان کو ذہن میں رکھتے تھے، تو پھر انہوں نے اس کے مقابلے کے لئے مکمل تیاری بھی کی ہوگی۔ لہذا مزاحمت سے برسرپیکار ہونے کے لئے مکمل طور پر ہتھیار بند ہو کر کابل کے نواح میں جمع ہوئے ہونگے!! لیکن انہیں بلا مزاحمت کابل شہر اور صدارتی محل ہاتھ آگیا ہے

تاہم اگر کوئی یہ خیال کرے کہ طالبان نے "پرامن ذرائع” کے ساتھ محض سیاسی و عوای تائید وحمایت سے کابل پر تسلط بحال کیا ہے تو ایسا شخص زمینی حقائق سے چشم پوشی کا ارتکاب کرے گا۔ بلا شبہ افغان طالبان نے اپنی مکمل مسلح قوت کے ساتھ پیش قدمی کرتے ہوئے کابل کو اپنے حصار میں لیا تھا جہاں کابل انتظامیہ کے لیے مزاحمت کے امکانات بوجوہ مسدود ہوگیے تھے

اس واقعہ کی ایک مختلف لیکن ناخوشگوار مثال سقوط ڈھاکہ ہے جب بھارتی عسکری قوت نے مسلسل پیش قدمی کرتے ہوئے ڈھاکہ کا محاصرہ کرلیا تھا تو پاکستانی فوج کو پہنچنے والی ممکنہ کمک کے سبھی راستے مسدود کردیئے گیے تھے دریں حالات جنرل اے کے نیازی،کمانڈر مشرقی پاکستان، کے بقول …”جنگ جاری رکھنا محض انسانی ہلاکتوں کو دعوت دینے کے مترادف عمل تھا۔

جنگ جاری رکھی جاتی تو چند روز کے بعد ہماری مزاحمت دم توڑ دیتی اور بھارتی فوج ڈھاکہ فتح کرلیتی لہذا میں (جنرل نیازی)نے غیر ضروری انسانی ہلاکتوں سے بچنے کے لئے ہتھیار پھینک کر ڈھاکہ دشمن فوج کے سپرد کردیا” ( بحوالہ. ” سانحہ مشرقی پاکستان ۔ تصویر کا دوسرا رخ۔ از جنرل نیازی)

کابل کے محاصرے اور بعض دیگر اسباب کی بنا پر جن کے متعلق گزشتہ تحریروں میں ذکر کرچکا ہوں،کابل حکومت کے وزراء ،عسکری ودفاعی محکموں اور خود صدر افغانستان نے غیر ضروری انسانی ہلاکتوں اور کابل کو کھنڈر میں تبدیل ہونے سے بچانے کے لئے امن کو ترجیح دی تو اسے ریت کی دیوار کہنا مناسب تو نہیں ۔

صدر اشرف غنی ملک کے اندرونی عسکری اور خارجی سفارتی دباﺅ کے بعد ملک سے چلے گئے بلکہ فرار ہوگئے ایسا کرنے کے لئے ان پر شدید اور موثر سفارتی دباﺅ ڈالا جارہا تھا ۔دوحہ میں طالبان کے مذاکراتی وفد نے اشرف غنی کے استعفی کا مطالبہ کیا۔


یہ بھی پڑھیں


پاکستان کے وزیراعظم نے برملا اپنے عوامی بیان میں اسی مطالبے کی تائید کی جبکہ واشنگٹن نے سفارتی ذرائع سے اشرف غنی کو یہی مشورہ دیا اور وہ 14اگست کو افغانستان سے نکل گئے۔ اگر افغانستان کے سیاسی منظر نامہ پر اشرف غنی کچھ سیاسی سماجی اور قبائلی وزن و ساکھ کے مالک ہوتےتو شاید وہ اقتدار چھوڑنے کے لئے ملک سے فرارکی بجائے کوئی مختلف آبرو مندانہ طریقہ استعمال کرتے

جناب اشرف غنی جناب معین قریشی،جناب شوکت عزیز وجناب حفیظ شیخ کے قبیل سے تعلق رکھنے والے برآمدی حکمران تھے،خلاءسے اترے تھے اور اسٹیج پر اپنا کردار نبھا کر کے پچھلی گلی سے نکل گئے وہ اب کہاں اور کس حال میں ہیں بالیقین کچھ کہنا ممکن نہیں۔

پاکستان کے ذرائع ابلاغ پر بیشتر مبصرین افغانستان بلکہ کابل کو پرامن طور پر کسی قسم کی مزاحمت کے بغیر فتح کر نے پر شاید طالبان کو امن کا نوبل انعام دینے کی تجویز پیش کرنے والے ہوں،لیکن وہ حقائق سے نظریں چرانے کے مرتکب ہورہے ہیں ۔

پہلی بات تو یہ ہے کہ افغان طالبان ایک مسلح جنگجو گروہ کا نام ہے جس نے بیس سال افغان اور اتحادی افواج کے ساتھ جنگ آزمائی میں گزارے ہیں،وہ قطعی طور پرامن سیاسی جہدکار نہیں، ثانوی بات یہ ہے کہ دوحہ معاہدے کے بعد اور بالخصوص امریکی افواج کے انخلاءسے قبل انہوں نے افغان آرمی کے ساتھ جنگ جاری رکھی تھی

معاہدے کے برعکس، تاہم معاہدے کے احترام میں امریکی واتحادی افواج پر حملے بند کر کے انہیں واپسی کے لئے محفوظ راستہ ضرور مہیا کیا تھا،جس کے عوض امریکی افواج انخلاء سے قبل اپنے فوجی کیمپ کا بیشتر جنگی سازو سامان افغان طالبان کے سپرد کرتے رہے،

حالانکہ امریکہ نے ایک کھرب ڈالر کے سرمائے سے افغان آرمی کو افغانستان میں مذہبی مسلح جتھوں کے خلاف صف آرائی اور افغان حکومت کی بقاءکے لئے قائم کیا تربیت اور جدید اسلحہ بھی مہیا کیا تھا،امریکہ اور اس کے حامی پاکستانی وزیر اطلاعات ندامت و طنزاً اسی ایک کھرب ڈالر کے بے صرفہ اجھڑ جانے کی دھائی بیان رہے ہیں،

کہا گیا کہ افغان نیشنل آرمی طالبان کے مقابلے میں ریت کی دیوار ثابت ہوئی،بلاشبہ افغان آرمی پیشہ وارنہ عسکری کردارادا نہیں کر سکی تو اس کی وجوہات پر غور ہونا چاھیے۔

افغان نیشنل آرمی کی ساخت میں ہی خرابی کی بنیادی جڑ شامل تھی اس میں پشتو بولنے والے علاقوں کے افراد کی نمائندگی 24فیصد سے کم تھی وہ بھی نچلی سطح کی سیاہ میں، جبکہ کمان اور افسران میں پشتون 5فیصد سے بھی کم تھے


یہ بھی پڑھیں


اسکے برعکس افغان طالبان کی اکثریت جنگجو سے لے کر کمندار تک پشتون تھے، میں نے 2014ءمیں ایف ای ایس کے زیر اہتمام افغان مسئلہ پر کوئٹہ میں منعقدہ ایک کانفرنس میں اس خدشے کا بر ملا اظہار کیا تھا کہ ” امریکہ جس نوعیت کی افغان فوج تشکیل دے رہا ہے امریکی افواج کے انخلاءکے بعد افغان نیشنل آرمی اپنی نسلی لسانی ساخت کی بنیاد پر ناکامی سے دوچار ہوگی اور اگر افغان آرمی طالبان کے خلاف موثر ثابت ہوئی تو اسکے نتیجے میں افغانستان قومی تصادم کے تباہ کن نتائج کے شکار ہو جایےگا "

اب درپیش حالات میں افغان آرمی کا کردار کھل کر سامنا آگیاہے۔ ناکامی ۔ اگر کشت و خون سے بچنا ناکامی ہے تو اولا اس فوج کو مملکت کی بجایے کابل حکومت کے دفاع کے لئے کھڑاکیا گیا تھا جبکہ افواج ،ملک کے دفاع کے لئے سینہ سپر ہوا کرتی ہیں،

افغان آرمی نے حکومت کا دفاع کرنے سے انکار کر کے ایک منفرد سطح پر کسی بھی ملک کی فوج کے لیے غیر سیاسی کردار کی مالج ہونے کو تقویت بخشی ہے۔ سوال یہ بھی اٹھتا ہے کہ اگر افغان طالبان کی بجائے کسی دشمن ملک نے افغانستان پر حملہ کیا ہوتو کیا۔

تب بھی افغان آرمی ایسی ہی پسپائی اختیار کرتی؟ میرا واضح جواب ہے قطعاً نہیں، افغان آرمی نے مزاحمت سے گریز اختیار کرکے اپنے ملک میں برادر کشی سے کنارہ اور حکومت کا دفاع نہ کرکے کرکے واضح کردیا ہے کہ ملکی فوج حکومت کی سیاسی بی ٹیم نہیں ہوتی بلکہ اس کا مقصد وہدف صرف اور صرف دفاع وطن تک محدود ہوتا ہے۔

امریکی افواج کی موجودگی میں اس نے جتنی مزاحمت کی وہ امریکی جبر کا نتیجہ تھی اس دوران بھی بے شمار مواقع پر افغان آرمی کے ہزارہا اہلکار اپنے اسلحہ سمیت فرار ہوتے رہے ہیں ہمیں افغانستان کے حالیہ واقعات کا اس تناظر میں بھی تجزئیہ کرنا چاھیے۔

افغان آرمی کو جب جنگ آزمائی برادرکشی کے سوا کچھ نظر نہیں آرہی تھی تو دوسری طرف جان بخشی کے ساتھ 80 یا کم وبیش ڈالر بھی مل رہے تھے۔ تو انہوں نے لڑنے اور مرنے پر زندہ رہنے پر ترجیح دی کیونکہ اب جبکہ طالبان افغان اقتدار کے انتہائی نزدیک ہیں وہ بھی تو مالی امداد و سفارتی حمایت کے لئے امریکہ کی طرف دیکھیں گے اور دوحا معاھدے کے مطابق خطے میں امریکی مفادات کے تحفظ کو ترجیح دینگے۔

برسبیل ٍ تذکرہ افغان طالبان سے سوال تو پوچھا جانا چاھیے کہ وہ اپنی حالیہ جنگ ۔ پیشقدمی سازوسامان کی خرید یا حصول و دیگر مصارف کے علاوہ۔ افغان فوجیوں کو ادا کرنے کے لئے کثیر مالی وسائل و ڈالر کہاں سے کیسے حاصل کررہے تھے؟

کابل پہنچنے پر افغان حکومت اور فوج نے جنگ سے گریز کر کے امن کے لئے اپنے ڈوبتے ہی سہی اقتدار کی قربانی دی ہے وگرنہ آرمی کے بغیر بھی افغان جنگجو سرداران چند ہفتے کی مزاحمت تو کرسکتے تھے مگر یہ ایک لاحاصل لڑائی ہوتی لہذا انہوں نے پرامن طور پر کابل طالبان کے حوالے کردیا،جس کا اعزاز انہیں ملنا چاھیے۔

دلیل دی گئی کہ اگر اشرف غنی کی حکومت عوامی مقبولیت رکھتی یا جمہوری ہوتی تو اسکے انہدام پر افغان عوام احتجاج کرتے۔ کیا ہم بھول گے کہ میاں نواز شریف کی منتخب جمہوری حکومت کو جب جنرل پرویز مشرف نے بیدخل کیا تھا تو پاکستان میں سیاسی احتجاج نہیں ہو بلکہ سکوت چھایا رہا کیا وہ منتخب حکومت نہیں تھی؟

کیا جنرل مشرف کو کبھی بھی عوامی حمایت میسر رہی تھیی ؟ طاقت کے سامنے عوام کی خاموشی کبھی اطاعت نہیں سمجھی جاتی اگر آپ اس مفروضے کے مخالف ہیں تو پھر اپ نظریہ ضرورت کی بھی تائید کنندہ ہیں ۔

افغانستان میں امن کا سوال طالبان کے عمل سے مشروط

سوال یہ ہے کہ بلا مزاحمت کابل کے صدارتی محل پر قبضے کے بدلےطالبان اپنی مخالف سیاسی جماعتوں کو ساتھ لےکر چلنے ہیں یا تن تنہا۔حکمرانی کا راستہ منتخب کرینگے؟، افغانستان میں امن کا اسی سوال کے جواب پر منحصر ہے۔

لیکن نہیں بھولنا چاھیے کہ قبائلی سماجی نفسیات میں اپنے خریف سے انتقام لینا جبلت میں شامل ہے اگر کابل میں مشترکہ حکومت نہ بنی تو جنگ کے شعلے بھڑکیں گے۔ اور یہ بھی اگر طالبان نے اپنی امارت میں جدت اپنائی تو بھی اسے دستیاب عوامی حمایت سے محروم ہونا پڑے گا۔ افغانستان تاحال امن استحکام اور تشویش کے بیچ لڑھک رہا ہے۔

افغانستان میں جنم لینے والے حالیہ واقعات نے عالمی سطح پر سراسمیگی پیدا کی اور روایتی حکومتی گٹھ جوڑ بھی توڑ دیا ہے۔میرا اشارہ برطانیہ امریکہ دو طرقہ تعلقات کی تاریخی جڑت کی جانب ہے۔ مغرب امریکہ تعلقات میں ماضی سی کیفیت موجود نہیں اور اپنی نئی مہم جوئی میں شراکت داری نہ کرنے کے برطانیہ نے بھی افغان پالیسی پر اختلاف کا اظہار کردیا ہے۔

برطانوی وزیراعظم بورس جانسن نے طالبان کے فتح کابل کو مسترد کیا اور پوری دنیا اور خصوصاً مغربی ملکوں سے مطالبہ کیا ہے کہ وہ عسکری ذرائع سے قائم ہونے والی طالبان حکومت کو تسلیم نہ کریں یہ موقف لندن اور واشنگٹن میں سفارتی فاصلے کی نشاندہی کرتا ہے

دوحہ مذاکرات کے دوران برطانیہ خاموش رہا ،جہاں طالبان کو دوبارہ برسر اقتدار لائے جانے کا ڈرامہ لکھا گیا،واشنگٹن نے اگر لندن کو تمام معاملات سے آگاہ رکھا ہوتا تو بورس جانسن عوامی سطح پر افغان صورتحال پر غم وغصہ کا اظہار نہ کرتا،

وزیر اعظم کا بیان سیاسی بصیرت کا فقدان

دوحہ مذاکرات کی جزیات سے ایم آئی6 نے تو برطانوی حکومت کو آگاہ رکھا ہوگا، بورس جانسن تب بھی چپ رہے اور جب انہوں نے دیکھا کہ معاملہ آخری سین میں داخل ہوگیا ہے تو طالبان حکومت تسلیم نہ کرنے کی اپیل کردی۔

اس کہانی کو پلٹ کر دیکھیں تو کہا جاسکتا ہے تمام فریقین افغانستان کے معاملات کو عدم استحکام کی جانب لے جانے پر متفق ہیں اور اس بار طالبان کو ساتھ ملا کر گیم کھیلنے کی کوشش کی گئی ہے پاکستان نیشنل سیکورٹی کے فیصلہ ساز اجلاس کے بعد طالبان سے اسلام آباد کے تعاون اور حکومت تسلیم کرنے کے لئے چار نکاتی درست نکات پر مشتمل نکات سے مشروط کردیا ہے

جبکہ وزیراعظم کا فرمان ہے کہ افغان عوام نے طالبان کی واپسی کے ذریعے غلامی کی زنجیریں توڑ دی ہیں، یقینا ابہام اور سیاسی بصیرت کا فقدان ہر طرف پھیلا ہوا ہے

Translate »